Bergfiets is ‘n kompeterende, individuele sportsoort waarin seuns en dogters kan deelneem en presteer. Alhoewel dit as ‘n “klein sport” in skole beskou word, is bergfiets ’n fenomenale sport buite skole se grense. Dis ’n sport wat families saambring vanuit alle hoeke van die provinsies.
Montana se bergfietsspan neem jaarliks met groot sukses deel aan die Gauteng Skole Bergfietsliga vir hoërskole, geborg deur Cycle Lab. Die toewyding van elke spanlid van graad 8 tot 12 dra daartoe by dat ons verskeie jare reeds gekwalifiseer het om aan die nasionale kampioenskappe deel te neem. Monties Bergfiets was die afgelope 8 jaar onder die top 10 skole van Gauteng. Die Monties eindig 2023 af met ’n spoggerige tiendeplek uit 91 skole.
Die bergfietsspan is in die bekwame hande van die professionele afrigter, Lionel Scholtz, en hy word bygestaan deur 2 entoesiastiese onderwysers en baie ondersteunende ouers. Amptelike oefentye is Dinsdae en Donderdae 14:20 – 16:00. ’n Bergfiets-oefenbaan op die skoolterrein word weekliks gebruik om tegniese vaardighede te bemeester. Die Bosveld Park is ook ‘n 3km-klipgooi weg van Hoërskool Montana se hoofhek, wat oefeninge soveel meer opwindend maak.
‘n Spoggerige Montana fietsryhemp word aan die begin van die jaar aangekoop waarin leerders met trots kan deelneem. Ons is opgewonde oor ‘n toer gedurende die Maart-vakansie.
Leerders mag enige tyd gedurende die jaar by bergfiets aansluit. Monties Bergfiets het 2 senior en 2 junior wisseltrofees wat jaarliks toegeken word aan presterende ryers, wat elk ook ‘n kontantbedrag insluit. Leerders kan ook uitsien en hard werk vir half- en volle erekleure. Die vereistes is duidelik uiteengesit in die toekenningsreglement. Ons sien daarna uit om nuwelinge by ons span te verwelkom!
