Wat landloop by Hoërskool Montana so lekker maak, is die feit dat al die atlete – hoërskool, laerskool en ouers – ’n hegte familie is wat lekker onder ’n paar gazebo’s by landloopbyeenkomste saamkuier.

Landloop is ’n spansport, maar ook ’n individuele sport, waaraan almal kan deelneem, ongeag ouderdom, liggaamsbou, of enige gebrek wat in ander sportsoorte ’n hindernis sal wees. Daar is verskillende kategorieë waarin atlete kan deelneem, vanaf ses-jarige ouderdom tot bo tagtig.

Montana se groep atlete bestaan uit atlete wat wil presteer, maar daar word ook voorsiening gemaak vir diegene wat net wil saamdraf vir ’n gesonder leefwyse. Laerskoolatlete is deel van ons oefengroep en selfs van die ouers oefen saam!

Die landloopseisoen begin reeds in April en eindig eers in September. Die jaarlikse oefenkamp by Zwartkloof is ’n hoogtepunt. By hierdie wildreservaat word nie net geoefen nie. Deurlopende spanbou-aktiwiteite, aandprogramme en wildbesigtingsuitstappies maak deel uit van die program en maak dit ekstra lekker.

Ons atlete presteer op provinsiale- en nasionale vlak. Hoërskool Montana se aflosspanne het ’n pragtige tweedeplek tydens die 2023 NWU-Prestigereeks behaal. Menigte van ons atlete is tydens die jaarlikse landloopprysuitdeling met spesiale medaljes vereer omdat hulle onder die top 10 posisies tydens die skoleliga geëindig het.

By die ASA-Kampioenskappe, waar 13 van ons atlete in Port Elizabeth deelgeneem het, het dit baie goed gegaan. Ons atlete het 4 goue spanmedaljes ingepalm. Ons spog ook met twee atlete wat vir hulle individuele wedlope elk ’n goue medalje ontvang het. Ses van ons hoërskoolatlete het onder die top 10 posisies in hul onderskeie afdelings geëindig, terwyl ’n handjievol van ons laerskoolatlete ook tydens die ASA-Kampioenskappe heelwat medaljes verower en pragtige posisies behaal het.

Ons sien uit na die 2024-seisoen wat op 26 April 2024 begin.