Hoërskool Montana is ‘n baie gewilde keuse vir rugbyspelers en al hoe meer seuns in die omgewing kies om hulle talente verder by Montana te ontwikkel. Ons spog met twee Blou Bulle 0/15-spelers. Ons het ‘n geweldige klomp seuns wat in die HPC-groepe saam die Blou Bulle-afrigters oefen. Ons jong B-span afrigters is manne met provinsiale agtergrond (0/21 en senior spelers).

Ons beskik oor uitstekende A-span afrigters, wat ons B-span afrigters gaan help om hulle speelervaring oor te dra na afrigting. Vanjaar neem Montana weer deel aan die Plaatafdeling in die Noordvaalreeks, waarin daar nou 10 skole meeding. Ons is baie opgewonde en sien uit na dié uitdaging. Montana poog om meer seuns geleenthede te bied om hulle volle potensiaal te bereik op die rugbyveld.

In 2023 het Monties se 9 spanne in ‘n baie sterk groep in die kompeterende NWU-Prestigereeks deelgeneem, met opponente Rustenburg, Die Anker en Hugenote. Ons sien uit na die 2024-reeks, waar ons kragte gaan meet met Wesvalia, Rustenburg en Oosterlig. Die toere wat in 2023 na Glenwood onderneem is, was suksesvol. In 2024 is die geleentheid aangegryp om met 125 seuns aan die Mega Sports Festival in George te gaan deelneem.

Ons is bevoorreg om al die A-span afrigters te behou en nuwe B-span afrigters aan te stel, wat fokus op die ontwikkeling van die seuns. Kondisionering is ‘n baie belangrike aspek om beserings te voorkom. Mnr. Bradley Engels is voltyds aangestel as Kondisioneringspesialis. Ons doelwit is om ‘n splinternuwe volledige gimnasium te bou sodat ons meer seuns kan akkommodeer en volle kapasiteit kan bereik.